Qendra “Shkolla e Drejtorëve të Institucioneve të Arsimit Parauniversitar” është regjistruar pranë Gjykatës së Rrethit Gjyqësor Tiranë me Nr. 1329, datë 18.01.2019, me statusin e një organizate jo-fitimprurëse. Misioni i saj është mbështetja e zhvillimit profesional të drejtorëve, nëndrejtorëve në detyrë dhe kandidatëve për pozicione drejtuese në institucionet publike dhe private të arsimit parauniversitar. Ky mision realizohet përmes administrimit të Programit të Trajnimit të Detyrueshëm (CTP) dhe procesit të testimit për certifikim që pason këtë program, si dhe sigurimit të zhvillimit të vazhdueshëm profesional për drejtues dhe mësues përmes Programit të Zhvillimit të Vazhdueshëm Profesional (CPD).

Fushat Kryesore të Veprimtarisë

1. Trajnimi dhe Certifikimi:
   • Organizimi, zbatimi dhe monitorimi i Programit të Trajnimit të Detyrueshëm (CTP) për drejtuesit aktualë dhe ata potencialë.
   • Realizimi i procesit të testimit për certifikim dhe pajisja me certifikata për drejtuesit që kalojnë me sukses këtë proces.
2. Zhvillimi Profesional:
   • Ofrimi i trajnimeve, seminareve, workshope, konferencave dhe aktiviteteve të vazhdueshme për zhvillimin profesional të drejtuesve dhe mësuesve.
   • Vlerësimi i nevojave për trajnime përmes analizave të vazhdueshme.
3. Kërkim dhe Politika:
   • Drejtimi i kërkimeve shkencore në fushën e lidershipit dhe menaxhimit të Institucioneve Arsimore.
   • Realizimi i studimeve në terren për përmirësimin e praktikave të menaxhimit të Institucioneve Arsimore.
   • Hartimi i projekteve edukative për përmirësimin e cilësisë në arsimin parauniversitar.
4. Bashkëpunim Ndërinstitucional:
   • Koordinimi me institucionet vendase për të përmirësuar politikat dhe standardet e menaxhimit të Institucioneve Arsimore.
   • Bashkëpunimi me institucione ndërkombëtare për shkëmbimin e praktikave më të mira në fushën e drejtimit të shkollave.